|
Aabshar-e-Noor
Poems in Urdu by Fatima Zabeth Beenesh, Hyderabad, India
Ya Nabi
Ham musalmano ko ab wahdat ki taqat dijye
Manqabat
Vo Arab ki sarzami’n aur vo jahalath qaum ki
Aap ki qurbaniyan aur vo adaavath qaum ki
Thi tabahi ki taraf dunya haqiqat bhul ke
Apne gulshan die unko hasi’n har phulke
Aap par bheje hain rab ne kitne salwat-o-salam
Jahil-o-gumrah ko bheja hai neki ka payam
Be kason ko aap se milta hai izzat ka jaha’n
Hai mulsalmano’n ki dunya ap hi se asmaa’n
Hai musalmanon ke dilme ek taaqat apse
Har pareshani me aafath me hai himmat apse
Apki hai justaju hardam mere ahsas ko
Jo amal bhi mujhse ho vo apki rahon me ho
Fakhr hai Allah ko bhi apki vo zath hai
Asman par gunjthi salwat hi salwath hai
Bhejte hain sab malaaik aap pe salwaath hi
Ye durud unki masarrath aur khushi hai ya Nabi
Ae Nabi Allah k ghar ye sifaarish kijiye
Ham musalmann ko ab wahdat ki taqat dijye
Paikar e Islam zakhmi aur ham hai be khabar
Dije ansu’n me hamari Ya Nabi abto asar
Ansuon k sath ankhon se ye khoon-e-dil ba’he
Dil hamara ho na gafil aur nazar raushan rahe
Nind hai gahri ye gaflath ki hamari Ya Nabi
Barh gaee Islam ki ab be qarari Ya Nabi
ho’n na kam ye hausle hamko dua ye dijye
paikar e Islam ki Agha hifazat kijye
apki hi raah par hon gaamzan ham Ya Nabi
khatm hojaen hamare jo bhi gham hon Ya Nabi
Ali hi Ali hai
Manqabat
Jahan me hamara Ali hi Ali hai
Ye alam hi sara Ali hi Ali hai
Hai bebas ko ik as dunya me un se
Bas uska sahara Ali hi Ali hai
Ho’n be chain kiun kar andhere jahan me
Ke suraj hamara Ali hi Ali hai
Do alam hain raushan Ali hi k dam se
In ankhon ka tara Ali hi Ali hai
Hai ahsas me vo hai har sans me vo
Hame’n sab se piara Ali hi Ali hai
Hai piason ka saqqa hai taskeen muztar
Ye dil ka sharara Ali hi Ali hai
Na parvah hai toofa’n se koi Beenesh
Hamara kinara Ali hi Ali hai
Ya Fatima Zahra (A.S.)
Hai tamanna ye Fatima Zahra
Hashr ke din tum apni chadar ka
Dal do hampe mehrba’n saya
Waqt hamper bura agar aya
Ya ilahi kare’n ibadat ham
Hausle ho’n na kabhi isme kam
Ham hifazat karenge parde ki
Cha’he ho mushkilat kitni bhi
Roze mahshar jo rubaru honge
Ahl parda Janaab-e-Zahra ke
Fakhr se uncha unka sar hoga
Aasra de’n jo apni chadar ka
Isi chadar ki to, panah me ham
Sue jannat rava’n rahen janam
Fatema yad rakhna Beenesh ko
Hashr me ilteja hai mat bhulo
Parcham-e-Zainab (A.S.)
Manqabat
Shabbeer ke parcham ko Zainab ne uthaya hai
Yu’n azm e Husaini ko Zainab ne barhaya hai
Islam bachana hai aur khauf na khana hai
Mazlum ko dunya me Zainab ne sikhaya hai
Tum jago Musalmano ta hashr ye kahti hai
Gafil ho Musalman gar Zainab ne jagaya hai
Zaalim ko kia rusva aaho’n se jo Zainab ne
Aj unka hai khoon taaza dunya ko bataya hai
Qatil ko mere Zainab nifreen na karna tum
Ye qaul bhi khehar kia khub nibhaya hai
Rumal ko ashkon se ta hashr rakhenge tar
Ye thaan ke Beenesh ne aprcham ko uthya hai
Lijiye Abbas (.S.) ab salam mera
Manqabat
Aap hain haajato’n ka darwaza
Lijiye Abbas (.S.) ab salam mera
Thamye baazu ko mere, gurbat me
Apke piyar se hai dil zinda
* * *
Magar Qur’an ko apnana hai dunya me bhot mushkil
Ba’nega pairave Qura’n karega do jaha’n hasil
Jie ga sar uthake is jaha’ n me hoga tu fazil
Ke Qur’an pardke ruho’n ko bhot asa’n hai ham bakshe’n
Magar Qur’an ko apnana hai dunya me bhot mushkil
Hai iftekhar hamko Iran ke shahido’n pe
Haq aj bhi zinda hai dunya ko dikhaya hai
Kia khub ran’ se tumne dushman ko bhagaya hai
Dunya thi muqabil me aur ek the tum tanha
Do dard e Husaini tha dunya ko bataya hai
Ghar bar apna chora khushyon se mu’n ko morha
Qurbaani ja’n ki deke Islam bachaya hai
Ho aaj tak bhi zinda tum qaum ki nazar me
Jaa’n bazo tumko ab tak har dil ne basaya hai
Hai iftekhar hamko Iran ke shahido’n pe
Soee hui ummat ko ja’n deke jagaya hai
Zinda Javeed Shuhada
Haq aj bhi zinda hai dunya ko dikhaya hai
Kia khub ran’ se tumne dushman ko bhagaya hai
Dunya thi muqabil me aur ek the tum tanha
Do dard e Husaini(A.S.) tha dunya ko bataya hai
Ghar bar apna chora khushyon se mu’n ko morha
Qurbaani ja’n ki deke Islam bachaya hai
Ho aaj tak bhi zinda tum qaum ki nazar me
Jaa’n bazo tumko ab tak har dil ne basaya hai
Hai iftekhar hamko Iran ke shahido’n pe
Soee hui ummat ko ja’n deke jagaya hai
Hai lala zar Iran Shabbir (A.S.) ka chaman hai
Tumne Husaini (A.S.) parcham Iran me uthaya hai
Kaise bayan kare’n hai qurbaniyan shaheedo
Har yaad ko tumhari ashkon se sajaya hai
kardenge jaa’n nichavar aabad rakha’nge ham
apne lahu se tumne gulshan jo sajaya hai
peetenge apna seena roenge aaj unpar
Islam par jinhonne khoon apna bahaya hai
Hathon ko uthakar ham ab ao kasam khaen
Ja’n denge Nabi(S.A.W.) par ham ye waqt vo aya hai
Hamrah unke Beenesh roenge umr bhar ham
Deen par jinhonne dilke tukhron ko lutaya hai
Hyderabad ho tu payendah
Nek shaho’n ki ye nishani hai
Hyderabad ki kahani hai
Ae Muahmmad Quli khuda tujhko
Kare firdaus ik ata tujhko
Neki hai Qutb Shah ki qaem
Unki izzat dilo’n me hai daem
Hyderabad Qutb Shaho’n ka
Mahnato’n se hi unko aj mila
Ye minaro’n ka shaher kahlae
Jo inhe dekhe dang rahjae
Isne har quam jo samethi hai
Jaise Hindustan ki beti hai
Hyderabad choti si dunya
Hamko tohfa khuda ne ye bakhsha
Teri tahzeeb ka javab nahi
Azmato’n ka teri hisab nahi
Dekhana chahthe ho dunya ko
Hyderabad hi ko aa dekho
Hyderabad hai hasee’n apna
Dilki dharkan bana mera sapna
Hyderabad jo bhi ata hai
Uska girveeda hoke jata hai
Hyderabadi hai zaban meethi
Bardi shohrat jahan me hai iski
Hyderabad ke gira’n gauhar
Vo rahe’nge sada mere sarvar
Barakto’n ka shahr hamara hai
Ye garibo’n ka ik sahara hai
Hyderabadi hai diler apna
Jo sakhawat main bhi hai dilvala
Hyderabad meri jan hai tu
Aur shafaqqat me jaise maa hai tu
Hyderabadi meherban hai sab
Ulfaten hamse dur hongi kab
Isne apne haseen daman se
Khushnuma gul die hai’n gulshan se
Ae khuda dushmanon ki sazish se
Hyderabad ko amaa’n dede
Shukria tera ae meri maadar
Hyderabad meri ja’n parvar
Ao ulfath se ham basaen ise
Khub se khub tar banaen ise
Ao dunya me ik misal bane’n
Ba wafa hoke ba kamaal bane’n
Asmano’n me ho teri shohrat
Teri aaghosh me mile raahat
Hashr tak nam tera ho zinda
Hyderabad ho tu payendah
Ghazal
tavajjo ke tere tohfe mujhe kia kia nahi milte
ishare har nafas dilse tere kia kia nahi milte
tara'ne,husn,sheereeni,mohabbat ,kaef, hairani
hasee'n tohfe mere mahbub se kia kia nahi milte
mujhe ab chahiye kia aur jab tu hai meri manzil
suku'n k vo hasee'n lamhe mujhe kia kia nahi milte
jahan unka hai karte hain vafaen varna dunya ke
ye khudbee'n ko vafa ke raste kia kia nahi milte
hare to'te me ja'n hai is bahadur marde maidan ki
niqabon me adu is jan k kia kia nahi milte
hae maida'n ek tanha teri yado'n me tarapte hain
sita're gam k ma're jab ha'me kia kia nahi milte
kinarakash hai kiun mahbub mere varna ae Beenesh
mohabbat k ishare sab tere kia kia nahi milte
Ghazal
haseen bachpan ka ek vo ghar tu dede
khudaya ik phir aisa dar tu dede
yahan ab koi kia dega kisi ko
jahan tu hai vohi manzar tu dede
gunah kam hongi jab kam hon umiden
vo raushan mujhko ik chader tu dede
na dena intezaron se vo jannat
tera daaman bas ae dilbar tu dede
hai tere vaste khushbo hi Beenesh
bina minnat ki jannat gar tu dede
Ghazal
chorde dunya ko jab muhbub dilbar sath hai
aaina shaffaf dilka tere jab gar sath hai
mujhko qatron ke ava'z darya dia ae nazneen
bebasi me tu hi ek taskeen dekar sath hai
talkhiyan hoti'n hain kia ek muntazar se poochiye
dard e furqat ajkal insa'n k aksar sath hai
be rahem us dasht ko ik pias ne zinda kia
peshavar is daur me vo pias ka ghar sath hai
kuch na bole lab magar dilki tarap ne ye kaha
garche hun tanha mai beenesh tu barabar sath hai
Ghazal
sab sitare hain ashk daaman ke
asman bichh gaya hai palkon pe
raah me teri apna sar rakh ke
ik jahan paaliya tujhe paake
bangae gulsita'n ye ashk e vafa
beneeyazi mili ye dunya se
tere dar ki hai khak mera sar
vohi ulfat ka bhara dil leke
chaen de thishnagi bujha akhir
jaam tu me'ra aaj bhardeke
waqt hota hai jab duaon ka
log sote hain bekhaber hoke
hai nasha yad teri ik beenesh
chahiye kuch nahi ye dunya se
Ghazal
kahan insaf sab zer o zabar hai
k is maahol me khun e jigar hai
sitaro'n se tu bharde mera daaman
ye lamhon ka sada dil muntazar hai
mujhe tu chahiye bas ek tu hi
suku'n hai har taraf tu pas gar hai
tarapta hai teri furqat me ye dil
mere har dard ka tu chara gar hai
ye zanjeeren ye sehra ek tanha
shikayat aadmi se be samar hai
nigahen morli apni jahan se
mulaqaton ka teri vo asar hai
nahi dil lagraha hai aj beenesh
siva tere vo sab se be khaber hai
Ghazal
mangtha kaun hai aadha piala
mujhko dena ho to bharkar dede
husn hi husn hai har su tera
dekhne ki bas ek nazar dede
bazm ki gaflaton ko bakhsh ke tu
teri basti me ek ghar dede
mangthe hain tujhi se tujhko ham
hamnashini mujhe to gar dede
sar hai zanu pe tere rote hain
kuch to ashkon ka ab samar dede
aasmano zameen ka tu hasil
ab to aho'n me kuch asar dede
teri furqat hai beebasi Beenesh
raushni hauslon ka dar dede
Ghazal
subah ka nasha ae khuda kia nasha hai
sukoon har taraf hai mu'attar faza hai
malaik ne lae navazish ke tohfe
aur insan ye behoshiyon me parda hai
tabassum gulon ka jo dekha to dilne
nigahon ko ashkon ka tohfa dia hai
ye kaisi fiza me gazal kahrahe ho
na gul hain na bulbul ye kia maajra hai
saza milrahi hai jo hamko shaher me
ye sarzad gunah hamse kaisa hua hai
samandar ki toofan me tanha safar hai
mohabbat me kya kya nahi tae kia hai
zameen dilki Beenesh falak bangaee hai
farishton me insan ye jaise kharda hai
* * *
Ghazal
tere nazon ki dilbar justaju hai
hasee'n daaman ki tere arzu hai
kaha'n hai husn bin tere jaha'n me
meri dharkan khushi ka rang tu hai
jahan ki jaan hai tera tabassum
tera har naz dilki abru hai
ae sheeri'n dilnashee'n khamosh kiun ho
meri nazron me tu hi char su hai
nazar teri hai dilka chaen Beenesh
rava'n ulfath me teri ye lahu hai
Ghazal
hasee'n lamhat the vo apne saare
tumhare milrahe the jab ishaare
teri qurbaniyan sabr o tahammul
qayamat tak hai dilme sab hamare
misal ek bangaee teri vafaen
mohabbat se bhare dilko hain piare
sivae sabr ke dunya me kia hai
hain saare hausle tere sahare
tere sab rang jo dekhe nazar ne
hai taskeen meri Beenesh ye nazare
Ghazal
Koi Tanha
haseen is jahan me na hoga vo tanha
nazara jo naazon ka dil karraha hai
musalsal andheron ki khamoshiyon ka
sukoon ye na tute ye dil kahraha hai
hai sae bhi hamrah is raushni ke
mai tanha kahan hun koi kah raha hai
haseen ye adaen hain sayon ki kitni
koi muntazar ek dilbar kharda hai
samandar ki bechainiyan dil ne bharke
jaziron me hasrat ki vo chalraha hai
hai parwaaz unchi meri aasma'n me
mohabbat ka daaman jo apna lia hai
ye sheron me ahsas tere hain Beenesh
tere dard ka ek chahra bana hai
Tajalli
ye ashk e tamanna hai teri tajalli
suku'n ye sahar ka hai teri tajalli
fiza ke taranon ka dil hamnava hai
ye dil ka dharakna hai teri tajalli
jo parvaz ka josh laee hai dilme
ye piari si chirdya hai teri tajalli
naee zindagi hai tarannum me unke
ye jeena sikhana hai teri tajalli
nava se hai unki nasha is fiza me
ye gam ka mitana hai teri tajalli
naee rah dilko batane vo gam me
parindon ka aana hai teri tajalli
ke tazeem dilne kia unki Beenesh
ye chirdyon ka gana hai teri tajalli
Ghazals
tasalli ho Beenesh meri dharkanon ko
tere laal honton ne talkhi jahan ki
palak ke jhapakne me shireen banadi
ye zulfe parishan shanon pe tere
mere ashk e paiham ko hardam jagah di
ravan hai ragon me lahu ulfaton ka
ye ashk tammana tarap ke bahadi
nahi chaen dilki tapish ko zara bhi
teri yad shonon ko hardam hava di
tasalli ho Beenesh meri dharkanon ko
zameen pe har ek qatra e dil sajadi
ke goya mera asmaanon me ghar hai
teri ulfaton ke paron pe safar hai
ke goya mera asmaanon me ghar hai
nazaron ko tere mai daman banalun
ye agosh jab ho mai tanha kahan hun
samandar ka toofan hai dilka dharakna
jahan arzu ke jazeeron basna
samandar ko nazron me ek din mai bharlun
ke maujaun se dilki har ek bat karlun
samandar ho bechain qadmaun ke neeche
jaziren bhi hojaen dil ke dareeche
mohabbat ki kohsaar pe ho thikana
bulandie parvaaz karke hai jana
sada ye tamannaen karti hain baten
teri yad me sab guzarti hain raten
Jhut se kya urooj paoge
Jhut jo aj tum apnaoge
Kis tarha khud se guzar jaoge
Aapko khud se dur karkarke
Kis tarha bekusur tum hoge
Pas aane ko aap khud hi ke
Umr bhar kya bataoge bhagoge
Khud se bezaar hote jaoge
Khud se khud ko jo dur paoge
Apni nazron me hoke khud hi khaar
Paoge is jahan me tum kab pyar
Zindagi talkh hoti jaegi
Aur bebas tumhe banaegi
Roz o shab khud hi ghut te jaoge
Jhut se kya urooj paoge
Pahla Qadam
Aadmi aadmi ko kaise dagha deta hai
Be gunahi ki badi usko saza deta hai
Kitne mushkil hain qadam pahle ke do char yahan
Har koi hiile insa’n ko hara deta hai
Cheekhta hai koi peeche se, to koi usko
Samne aake khare hoke hata deta hai
Kohniyan marta hai koi use bazu se
Zor deke use bazu se gira deta hai
Apni manzil pe pohnchne ke liye vo Beenesh
Khudko himmat ka iradon ka banadeta hai
Kiun kisi dil ko tu rulaata hai
Dil hai kia khud vo ek paikar hai
Gam o ahsas ka jo maz’har hai
Ek sangeen jahan rakhta hai
Kis ke hathon se bhala uthta hai
Chahtha hai har ek sambhale use
Aur qaabu me apne la’le use
Ek jahan hoke dil hai sheeshe ka
Karo lakhon jatan ye tu’te ga
Dil ka lena yahan nahi aasa’n
Dard ka ikse, hai kahan darman
Hai samander si chashm-e-tar isme
Koh jaise hain gam ke ghar isme
Pyar ki rahen ye jo rakhta hai
Bagh se ulfaton ke sajta hai
Ilm ka asmaan hai isme
Band saari khudaee hai isme
Jazbe toofan jaise rakhta hai
Zilzilon ki tarah tarapta hai
Hai sada dilki baat dunya me
Hashr tak hai hayat dunya me
Dil se parwaz admi ko mili
Dil ho zinda to jan me jan aee
Ka’ba-e-dil ko ko kiun tu dhata hai
Kiun kisi dil ko tu rulaata hai
Kahan hoga ulfat ka aisa jahan
Na razi hai bhai se bhai yahan
Behen se behen ki hai nafrat ayan
Na beta kabhi kush hai ma’n bap se
Hai biwi ko shauhar se ulfat kahan
Nasihat pe hoti hai ma’n baap ki
Pardhi likhi beti ki lambi zabaan
Na dilchaspi shauhar ko biwi se hai
Na bete se Khush hai zamane me ma’n
Banate hain phir bhi vo rishte nae
Mile ya na hasil ho us se amaan
Koi khush hai unse to naakush koi
Rishton ke khisse kaen kai bayan
Jo aapas me razi hon Beenesh sabhi
Kahan hoga ulfath ka aisa jahan
In trashe pattahr se kiun jahan basathe hain
Pattharon se ye insan dil bhot lagata hai
Ek bhari daulat ko kis tarah lutatha hai
Vo tarash ke patthar suraten banaata hai
In tarashe patther se shaher ko sajata hai
Shaher ka gareeb insan dekhta hai jab inko
Hoke khush bhot dilme bagh ek khilata hai
Bache sab garibon ke dekhte hain hairat se
Bhuk se agar inka pet bilbilata hai
Kia aham nahi hota mulk ka gareeb insan
Inse koi hamdardi kiun nahi jatata hai
Pattharon se kia barkhe admi nahi hote
In trashe pattahr se kiun jahan basathe hain
Kia dunya ne haq mana hai?
Raftaar jahan ki yun dekhi
Ho mauj samandar me jaisi
Nas nas me hai meri tu hi
Ulfat ki hai teri basti
Hamko hai chadar hi piari
Mahfuz hai isme har beti
Te’ri ulfat rakkhe jo dil
Hoga jeena uska kamil
Ghar ik aala tum paoge
Qurbani dunya ki deke
Bhule ga dil tujhko kaise
Maznil ek teri apna ka
Beenesh kia hamne jana hai
Kia dunya ne haq mana hai?
Tu badalta raha ae kash badalte ham bhi
Naya mausam naee umeed lie ata hai
Bas dilase pe dilase vo die jaata hai
Mausam aa aa ke to bahlate rahe dilko magar
Ham umidon ko lie peete rahe khoon-e-jigar
Piari chirdya teri avaaz lagi piari si
Tu bhi to lagti hai ham jaisi thaki hari si
Ham zaban teri tarah koi nahi hai apna
Bardi parwaz hai apni bhi barda hai sapna
Hamzaban hota mera jo koi tujhsa maasum
Ek jannat meri banjaata jahane maghmum
Tujh se shikva nahi mausam ye hai kismet apni
Tu badalta raha ae kash badalte ham bhi
Jo dunya ki ulfat ko rakhta ho ae dil
Na hoga vo teri mohabbat ke qabil
Zameen ki mohabbat me insan hai hardam
Magar aasman hi hai insan ki manzil
Justuju ho jo ye dil me to na harenge ham
Zindagi ko teri ulfath me sanvarenge ham
Rat din nam tera dilme pukarenge ham
Husn ne teri zamane ko sanvara hai bhot
Rang dekar tera is dil ko nikharenge ham
Khush numa barg hansi hai teri rang-e-alam
Jis se har baar e giran dil se utarenge ham
Pas aega mere khuaf ka saya kiun kar
Teri chahat me har iblis ko marenge ham
Teri manzil ki tamanna me hai Beenesh bechain
Justuju ho jo ye dil me to na harenge ham
Kaisi dunya ki lie arzu ham jeete hain
Kaisi dunya ki lie arzu ham jeete hain
Khuaf ka gham ka bhara jam yahan peete hain
Ae jahan teri javafaon ka ho shikva kiun kar
Teri fitrat hai yehi hont ham bhi seete hain
Ae sham
Kia hua dard mila bebasi ka jo hamko
Sabr bhi sath mila dard ka gham kaise ho
Sham hai vaisi hi suraj ki hai vohi surkhi
Intezar apna vohi aur hai vohi be chaini
Ae hava’o jo guazar jati ho khushyan lekar
Jata jate hue jao mujhe kushyan dekar
Ae falak aur haseen barg zara samjhana
Chaen aega mere dilko kahan batlana
Kab talak sath tumhara hai mujhe samjhana
Sath rahna hai tumhe dur nahi hai jana
Dua
Ae khuda chaen de mere dilko
Paas ab mere karde manzil ko
Ae khuda tu hamara rahman hai
Hae kya sust apna eema’n hai
Ek nukte pe khardi hai laikin
Khub dunya ye badi hai laikin
Chiz har ek khub surat hai
Dekhne ki magar zarurat hai
Tu sa’maja meri nigahon me
Yun asar ae meri aahon me
Teri khushbo hai meri rahon me
Tu hi dikme hai aur nigahon me
Tujh pe sab kuch lutaane ae the
Tera banne ki kasme’n khae the
Be khabar bangae hain khud se magar
Rat din pee rahe hain khoon-e-jigar
Sabr manga hai zar nahi tujhse
Koi shikva magar nahi tujhse
Kiun aseeri me ranj kart hain
Jeete ji zindagi me marte hain
Ham to jeete hain aas mein teri
Aur marte hain pyaas me teri
Ham nasheen-e-Musa alaihis salam
Toor par rabb se ye Musa ne kaha
Ham nashee’n hai kaun jannat me mera
Kaun hai banda jo hai sathi mera
Nam kia hai aur pata uska hai kia
Sunke Musa se Khuda ne ye kaha
Vo hai ik qassab tere shahar ka
Hai mehelle me fula’n uski dukaa’n
Tumko milna hoto to jao tum vaha’an
Shauq milne ka lie Musa cha’le
Ham nashee’n ko dekhne Musa chale
Jab pa’ta us dost ka unko mila
Thi duka’n us admi ki jis jaga
Ja raha tha band karke vo dukaa’n
Raat ko thak harke apne makaa’n
Uske peeche peeche Musa bhi cha’le
Ta’ke un k hamnasheen ka ghar mi’le
Apne ghar me aadmi dakhil hua
Yu’n pata Musa ko uska milgaya
Dusre din hamnasheen k ghar gae
Hazrat e Musa khushi dilme lie
Dar pe dastak di unho’n ne shauq se
Milne ko bechain the vo zauq se
Ham nasheen ne khola darwaza kaha
Kaun hai batlaaiye hai kam kia
Muskurae aur kaha karke salam
Aj laya hun tumhara ik payam
Tumse Milna hai mujhe mard-e-khuda
Dekhne tumko ba’da be chain tha
Baat ko Musa ki jaise hi suna
Ghar ke andar aaiye unse kaha
Der tak phir guftagu karta raha
Rubaru Musa ke vo baitha raha
Waqt khane ka jo aise me hua
Utha fauran aur un se ye kaha
Ab ijazat dijiye kuch der ki
Aunga ik kaam karke jald hi
Baith ke phir dono khana khaenge
Jo payam aya hai sunte jaenge
Hamnasheen ki ek boodhi si thi maa
Vo bhot kamzor thi aur na tavan
Paao’n the kamzor chalne ke lie
Baithna mushkil tha lamhe k lie
Jhule me rakhe hua tha maa ko vo
Yu’n navazish karta jaise jaan ho vo
Goad me apni uthata maa ko vo
Aur shafaqqat se bithata maa ko vo
Hath se khana khilata maa ko vo
Phir se jhule me litata maa ko vo
Karta tha har kam maa ka shauq se
Dard uska baanttha tha shauq se
Aise hi Musa ne dekha hamanasheen
Karraha hai khidmate madar vahi’n
Vo khilake maa ko jo farigh hua
Hath aur chahre ko maa k dhodia
Maa ko jhule me jo rakha piyar se
Fasle pe kuch kharde Musa bhi the
Dekha us manzar ko Musa ne vaha’n
Zer lab kuch kahrahi hai uski maa
Baat apne dost se daryaft ki
Kahti hai maa kya ye batlao abhi
Tumne rakha tha use jhule me jab
Kah rahi thi kuch tumhe vo zer-e-lab
Hans ke bola de rahi hai maa dua
Roz-o-shab kahti hai maa mere khuda
Mere bacche ko ye rutba kar ata
Ham nasheen Musa ka jannat me bana
Sunke Musa bat ye kahne lage
Ashk unki ankh se bahne lage
Mai hi Musa hun tumhara hamnasheen
Mai payambar hun jo aya hun yahin
Kuh-e-Toor se laaya hun mai paigam ye
Mujda hai rabb ka tumhare nam ye
Ho tumhi jannat me mere hamnasheen
Ham zabaan ho dost mere tum vaheen
Sunke ye piagam vo aage bardha
Hath ko Musa k ik bosa dia
Khush hue Musa duaen usko di’
Aur jaane ki ijazat maangli
Shukr ka sajda ada usne kia
Isse accha dars ye hamko mila
Ae khuda insan ko taufiq de
Farz-e-avval kidmate madar bane
Javab-e-Nabi (S.A.W.)
Paigambar-e-Akram se kisi shakhs ne poocha
Maa baap me hai sabse aham kaun si hasti
Is shaks se farmaya Nabi ne ye javaban
Maa hi to hai, Maa hi to hai, Maa hi to hai apni
Rahmatain
Vo rahmaten jo bohot hi haseen hoti hain
Bashar ki haq mein badi dilnasheen hoti hain
Khabar bashar ko sada ne’maton ki hoti hai
Hamare lab pe sana rahmaton ki hoti hai
Panah leta hai insaan rahmaton hi par
Sahara milta hai insan ko nematon hi par
Unhi se aas lagae hue vo rahta hai
Na karna usko tu mahroom, tu jo beena hai
Panah de ha’me aagosh-e-fazal me le le
Tere gazab ko nahi jante tere bande
Teri hi rahmat-o-ulfat pe hai nazar meri
Tere hi husn pe shafqat pe hai nazar meri
Ham isse hatke nahi jante zara ab to
Tera hi qurb hai maa jaisa pursukun hamko
Zara bhi gham nahi aagosh me kabhi ma’n ki
Teri panah to had aakhri hai insaa’n ki
aakhri dilki panah ghah se mahroom na kar
Khudaya apni tu is rah se mahroom na kar
Hai tu haseen-o-jameel aisa kainat me bas
Ke sara husn samaya hai teri zaat me bas
Ye saari raushni bas ik teri nigah se hai
Tere hi noor ki jaanib ye hame’n khinchte hai
Ye noor dil me jo insanon ke utarta hai
Akelepan ko ye insan ke dur karta hai
Haseen chehron me tu hi dikhaee deta hai
Haseen phulon me tu hi dikhaee deta hai
Bhot se chahron me chahra tera chupa ya rab
Mere qalam se mera sath mat chur’ha ya rab
Baarish ki Dua
Raat din tujhse ilteja hai yehi.........ae khuda tujhse bas dua hai yehi
Ab ye sukhi zamee’n hari karde......pir se daryaon ka tu mu’n bharde
Hai gunh gar bakhshde ya rabb.....hamko neko’n k naqsh de ya rabb
Ham pe baarish ki tu inayat kar....... aaj poori hamari haajat kar
Abr sab legae hava saare....... rah gae ham to hoke bechaare
Dekha insa’n ne aas ke maare........asmano’n ko pyas ke mare
Bardi taklif me hai sab insa’n....gham se ya rab to hamko dede ama’n
Hampe rahma’n tu ab taras khana...........aasion pe tu raham farmana
Abke barsaat khub barsaana...............phir na insa’n ke dilko tarsaana
Hain pur umid ilteja sunna..................apne dar se dua na lautana
Khub taani hai abr ki chadar...........isko barsade raham tu khakar
Asma’n dekhte hain sab Beenesh.....dilme barish ki hai kitni khahish
Numayandaye Khuda
Insan ko kahthe hain numayanda khuda ka
Ye bat bataane ko khuda ne use bheja
Piara hai khuda ka jo karega vo bhalaee
Batlaye ga kirdar se ausafe ilahi
Paega maqam ek vo Allah ke ghar me
Rakhe ga jo ausafe ilahi ko nazar me
Insa’n bana khuda ka numayanda is lie
Vo zindagi bashar ki jahan me sa’nvar de
Ye farz khuda ne jo har ek bande ko saun’pa
Insan ko kahne ke numayanda hai iska
Rishtae gham
Rishton me is jaha’n ke ahsas barde kam hain
Mohtaj zarurat ke dunya me bhot ham hain
Khush naam barde hoke araam se rahke bhi
Be chain hain muztar hain aur gahre bhot gham hain
Ghazal
Naraaz hua jab insa’n se dunya me rabb ne utara hai
Khaliq ki raza apnane ko ek nek amal ka sahara hai
Sabith karne iska eema’n insa’n ko jaha’n me laya hai
Qurbat iski hasil karne insa’n ko rabb ne rulaya hai
Insa’n ko hasi’n chahra deke rab ne phir jannat usko di
Faani dunya me utara phir kamzori jab uski dekhi
Hasti ko noor ata karke zulmat se bahir ana hai
Haivani jeene se usko ruhani jeena paana hai
Takleef hi deta hai dauzaq har jan vahan par roti hai
Dauzaq hi uski ki manzil hai jo jan andheri hoti hai
Koorde da’n jaisa dauzaq hai nakara cheze’n rakhta hai
Hasti gar be waq’at hogi ik dauzaq hi ghar uska hai
Dil mera torke aisa na rulana ya rabb
Ho jo saya use insa’n na dikhana ya rabb
Hairaan
Ayyam guzare jo ham ne ye bat samajh me aee hai
Kaisa ye husn jaha’n ka hai kaisi iski ra’naee hai
Hokar qaidi is dunya ka maghrur jaha’n se jata hai
Daulat ki khatir rishte vo, dil tord ke kitne jaata hai
Samjhe jo na khud ko tum laikin auro’n se tavaqqo kiun kar hai
Pahchan na paya koi mujhe anjaa’n kiun ye sara ghar hai
Ahsan kia hai phulo’n ne veeran gulistan me aake
Phir chordiya dia tanha hamko khushbo ko hava me phailake
Kiun hath hai kismet ka ya rabb insano’n me jo jeena hai
Toofa’n me kaise bahna hai kiun khoon jigar ka peena hai
Taufeeq khuda kuch aisi de, ham rahen zarurat kam karke
Aise hi izzat milti hai, is me hi suku’n ik hamko de
Kiun khun me ulfat bahta hai kiun daurdne ja’n me lagta hai
Beenesh saama’n ye kushyon ka veeran jahan me lagta hai
* * *
Qat’a
Tu jannat ki khahish ko dilme na rakhna
Nazaro’n se chahre ko tu morlena
Ham’e dekhna hai vohi ek chahra
Bina tere be shakl hai meri dunya
Zor hota hai badan ka jo bhi
Ek hi tap ki hai taqat iski
Rakhe taqat jo koi ruhani
Aafto’n se use sambhalegi
Khudaya hausla de hausla de
Khudaya hausla de hausla de
Kare’n mahnat jo ham iska sila de
Bardi umeed leke ji rahe hai
Meri manzil to ab tu hi batade
Mera mahbub dilme bas gaya hai
Kabhi deedar ik usse karade
Hai dil bechain dheemi zindagi hai
Suk’un ki rah tu mujhko batade
Hain lambi khahishe’n aur umr choti
Ilahi ab tamannaye’n jalade
Hai Beenesh bebasi in gaflaton me
Tu gahre khab se ya rabb jagade
* * *
Noor-e-Sama
Varafta hue jaate hain surat pe tumhaari
Kia nur ka paikar ho tum ae barge bahari
Tum hogae jab hamnashee’n Noor-e-Sama se
Paikar se tumhare hua ek nur sa jaari
Beenesh
Ghazal
Hai iltehab dilka har ik fikr kham se
Khushya’n mili hai hamko barde saste dam se
Bimario’n se bhaagte ho jaise dur dur
Daaman bachalo vaise hi fe’le haram se
Ulfath se jam hasti ka labrez hogaya
Zinda hai bas ham ek muhabbat ke jaam se
Taari hava me har su hai ik teri hi khabar
Milti hai dilko taazgi ek tere naam se
Chalna hai tumko rah pe parvardigar ki
Kiun khud ko past karte ho tum apne kaam se
Beenesh ye hausla ye taffakur ye faisla
Aate hain dilke pas mere khush khiram se
* * *
Qat’a
Bhonkta insa’n ho gar kutte bhi ghabrate hain sab
Apki gar ho zaba’n meethi to pas ate hain sab
Teer barsae zaba’n gar dur hojate hain sab
Chordie kutto’n ko hai fitrat me inki bhonkna
Bhonkta insa’n ho gar kutte bhi ghabrate hain sab
Ho ke havas ka banda musrif hai kaisa insa’n
Ghazal
Ho ke havas ka banda musrif hai kaisa insa’n
Mahrib ye chahe insa’n rahjae banke haiva’n
Hissa kamaai ka kuch dena hai garibo’n ko
Dulat parast hoke tum kaise ho Musalma’n
Magrib ne kardia hai kathputli kaise hamko
Nache isharo’n par hai ham aj banke nada’n
Paiso’n hi ki jakard me rahta hai paise vala
Daulat ko karne hasil banjata hai vo haiva’n
Kis chain se guzare ham ne basar kie dil
Jaise Khuda ka ghar me ab tak rahe ho’n mehma’n
Zad-e-safar ki socho jana hai sabko ik din
chordo ye fikr-e-dunya razzaq hai vo rahma’n
gham me tujhe pukaru’n hoke tere havale
tanha rahu’n na Beenesh hai rabb mera nigahba’n
Qata’t
Rakhna panah me tu harwaqt mujhko ya rabb
Shaitan ki aseeri hai sakht mujhko ya rabb
Tera hi asra hai iblis ke nagar me
Bahkade phir na aakar kambakht mujhko ya rabb
* * *
Teri chahat ne ja’n di bandagi ko
Hain bojhal kia karen sharmindagi ko
Jo miljata masiha koi Beenesh
To miljati haqiqat zindagi ko
* * *
Ghazal
Sadyo’n se raha hai ye tera mera yarana
Jalta rahege jab tak is baz me parvana
Jo soz hai seene me bard jaega vo jis dam
Is dam hi karen sajda dil hoga jo deevana
Nazzarae gul karke jis tarha jie bulbul
Apna bhi isi jaisa banjaega afsana
Paigam mohabbat k hain phul k honto’n par
Denge vo tabassum se dil hoga jo vi’rana
Aahat koi qadmo’n ki ae meri janib bhi
Labrez hua Beenesh ab sabr ka paimana
* * *
Ayyam yu’n guzara hain rangee’n khayal me
Ae khab tumne phansa hai khabo’n k jal me
Banta gaya khayal haqiqat me zindagi
Lekin yaki’n nahi hai khud apne zaval me
*
Ghazal
Tu ne rango’n ko mere dilke yu’n bikhera hai
Aasm’an kaisa haseen tera ye savera hai
Tang kitni lagti hai dam bhi ghutne lagta hai
Ae zami’n mujhe tu’ne har taraf se ghera hai
Rang e zeest tanhaee se badal hi jaega
Zer e khak socho tum ik vaha’n basera hai
Zindagi naee paee jab hame’n hua mahsus
Neend me hai har insa’n charsu andhera hai
Jam zeher peele’nge ham hazar ha Beenesh
Is tarh tujhe pana hi to azm mera hai
* * *
Mabada dosti hamko kahi’n gumrah karda’le
Bhot si chahato’n se hath apne ham ne dhoda’le
Nahi hoti hai bas gumrah karne dosti leikin
Adavat dusron ki janib e manzil hame lae
Qurbanion ko deke rahmat talash karna
Ghazal
Qurbanion ko deke rahmat talash karna
Iski mohabbaton ki halat talash karna
Ae ho jis jaha’n me vo piar se hai khaali
Tum vus’ato’n me dilki ulfat talash karna
Zeba nahi hai tumko chaho kisi se ulfath
Tanhaion me rahke raahat talash karna
Insa’n ki chahato’n me hote ho kh’w’ar kab tak
Tuma dub kar gamo’n me raf’at talash karna
Goya lagi hai sabko dunyae du’n se ulfath
Tum be niyazion ki daulat talash karna
Kagaz k phul hain sab, nairangio’n ko lekar
Is gulstan me tum gul mat talash karna
Taklif deh hai beenesh dunya me aj rahat
In rahato’n se bahtar zahmat talash karna
* * *
Qat’aat
Bas thak gae dunya se ab roke tarapna hai
Is ajnabi basti me ik tu hi to apna hai
Hai shauq teri janib maqsad hai tu hi apna
Har sans me ye ulfath apnaka panapna hai
* * *
Kisi magrur chahre se pata itna to chalta hai
K apnake ye surat admi be shakl kaisa hai
Giza kirdon ki hojaenge mar kar qabr me akhir
Hame husn o javani par bhala kiun naz karna hai
* * *
Nasoor
Hai fakhr kitna inko yaha’n apne daam par
Kis tarha mard bikta hai shadi k naam par
Batlao kia vatan ki hifazat karenge ye
Dushman se muskilo’n me bhala kia lardendge ye
Hai’n garche mard, hath pe aurat k hai nazar
Gairat kaha’n hai inki, hai andher ka nagar
Kia naojavan aj ka ye sher mard hai
Hai uska khu’n safed to ahsas sard hai
Hamdardi bhi nahi use halaat se yahaa’n
Gar piar hai to apni hi ik zaat se yahaa’n
Taqat jo di hai rabb ne use bojh uthaane
Phir banta hai kiun bojh ye dunya ko satane
Ye paikar vatan pe hai nasoor gahra aj
Afsos nauvjava’n ka bikta hai sahra aj
Aurat ki kaisi izzat o tauqeer aaj hai
Beenesh bi’ke hain mard yaha’n kia samaj hai
Zere falak insa’n ye kirdar banata hai
Ik chashmae shri’n vo dilhi se bahata hai
Aur tel ka chashma tu kuch logo’n me pata hai
Ik pias bujhata hai ik aag lagaata hai
* * *
Kuch ash’ar
Javano’n ko javani pe barda gurur aajata hai aksar
Talatum aql ko unko ye bas khajata hai aksar
* * *
Ik qatrae bara’n se jab nur guzarta hai
Jo rang chupa isme kia khub bikharta hai
* * *
Ghazal
Kashmakash hi zindagi ka nam hai
Teri qurbat hi ka ik paigam hai
Jo jaha’n me tujh se chahra pher le
Dekhna vo hashr me badnam hai
Sazishen ye hain hame’n tordenge vo
Kaisa inka ye khayal e kham hai
Hai tumhara chaho jo bhi tum yaha’n
Iska dena tumko bhi ik dam hai
Zindagi toofan hai Beenesh magar
Isko ulfath se teri aram hai
* * *
Kis ke maane gae ahsan yaha’n
Kis k poore hue arman yahaan
Ulfato’n ka hai ha’me pas magar
Dil jalane k hain samaan yah
* * *
Zarurat zarurat zarurat zarurat
Zarurat ki dilme hamari hai moorat
Zarurat hi peeche hai insa’n k hardam
Nahi isse hatne ki hai koi surat
* * *
Khudaya shukriya tera khudaya
Rulaya too’ne phir hamko hansaya
Musibat me madad milti hai tujhse
Hai mujhpar mahrba’n tu hi khudaya
* * *
Unhe jo dekha to toofan uthgaya dilme
Bohot kie the jatan chashm ashk bar na ho
Ha’me satake tujhe chain kaise aega
Kabhi ye ho nahi sakta k ankh chaar na ho
* * *
Beniyazi me jo kare parwaz
Ghazal
Khauf insan ko jakardta hai
Khahishon ko jo le pakartha hai
Hajato’n ka ba’ne vo kiun banda
Hajate’n to ga’le ka hain phanda
Ruh parwar hain aj taqatwar
Vohi zinda hai’n aur vohi niddar
Beniyazi me jo kare parwaz
Asmano’n ka vo rahega baz
Gamzada bhi hai aur paresha’n bhi
Hain ye kamzor dil, harasa’n bhi
Jab na vo husn dekh pata hai
Khud bhi rota hai aur rulata hai
Husn dekhega jo zamane ka
Is jaha’n ko hasee’n banadega
Dusro’n ko vo zindagi dega
Aur unhe khub sa sanvrega
* * *
Phul aur Insan
Phul insa’n ke dil pe chaate hain
Apni taqat vo yu’n batate hain
Piar insan karle topo’n se
Phul isko magar jhukate hain
* * *
Farishte
Dilchaspi nahi hoti farishto’n ko kisi se
Khaliq ki ibadat hi kia karte hain milke
Kia nur fisha’n hoga falak unki bedaulat
Ae kash jaha’n hota hamara bhi kuch aise
* * *
Tufuliat
Jis tara paida kia hai mai isi halat me hun
Kitni taqat aur tavanaee ki hajat hai mujhe
Mai tufulait se niklu’n kuch namu to pasaku’n
Ruh parvar beniaazi ki zarurat hai mujhe
* * *
Teri manzil hai dilki gahraee
Teri manzil hai dilki gahraee
Isi manzil ke rahnuma banna
Karke vada jo ae the tumse
Isi vade ki laj rakhlena
Hamjo aasi hain aur hain ghafil
Tum andhero’n me raushni dena
Dur apne ghazab se karke tu
Aaj rahmat me hamko lelena
* * *
Qat’at
Hai aina tera zarra zarra niha’n hai isme tere hi jalve
Ik arzu bas rahi hai meri ke dilko tera hi ghar banale
Aseer insa’n hai is jahan me gurur ka aur zaruraton ka
Hai zar hi ba’is kudurato’n ka dilo’n ki garmi hai ulfato’n se
* * *
Har chiz barthi jati hai apne kamal ko
Paake uruj murdthi hai phir vo zaval ko
Manzil ke simth rat din insa’n hai gamzan
Manzil me dhundta bhi hai kia vo halal ko
* * *
Hai rizq jo sasta sa sadqa hai garibo’n ka
Milta hai ameer’on ko ye unke nasibo’n se
Khane ki koi qeemat leta jo khuda unse
Hargiz na ada hoti dunya ke ameero’n se
* * *
Koi kitab hai jo ka’re itna hoshyar
Jitna Quran hamko jagaata hai bar bar
Taalim tu’ne khub tarasha ha’me magar
Hum aur sa’nvarthe gae Qur’an se karke piyar
* * *
Jo dair faisle Beenesh sunae jaate hain
Ghazal
Jo rok pae nahi kia darae jaate hain
Vo azm torne yu’n azmae jaate hain
Jo arzu ke hasee’n bagh dilme khilte hain
Ye khare harat-e-dil kiun rulae jaate hain
Girift me jo masail ke ae kuch aise
Bahar se bhi ham ankhe’n churae jaate hain
Meri zabaan-o-baya’n mere ho tumhi sathi
Tumhi se dilko ham apne basae jaate hain
Ye kainat ki taqliq ik khuda ki hai
Isi ke naqsh ke chahre banae jaate hain
Nahi hai hamko ta’luq riyaee dunya se
Ke jisse jan ham apni churdae jaate hain
Sanvarta nahi kab tak ye zindagi insa’n
Ye inqilaab bhi kia yu’nhi lae jaate hain
Jo khahishat ki takmil me laga hai dil
Ye pau’n daldalo’n me yu’n phansae jaate hain
Tri panah me ho’n be niyaziya’n meri
Hame’n jo rangee’n zamane bulae jaate hain
Hai’n dur manzil-e-maqsud se qadam apne
vo raaste jaha’n shaitan’ bithae jaate hain
ye zeest qabr ki tanhiyo’n si lagti hai
ke ankh ulfato’n se ham churae jaate hain
dil apna tordia be vafaiyo’n ne teri
hayat jab bhi tujhe azmae jaate hain
kis ka buth kabhi tuta to khud bhi vo tuta
ik umr uspe ye ansu bahae jaate hain
ha’me to ro’ne ki qeemat bhi hai ada karna
ye gham ke ashk jo paiham bahaye jaate hain
mitaye’n arzuye’n dilki magar batlao
wafa ke daam kabhi kia lagae jaate hain
ho justaju ji’se haq ki vohi to haqgo hai’n
jo haq pe hain da’re haq pe bulae jaate hain
uthane tajru’be muddat bhi chahiye leikin
jo dair faisle Beenesh sunae jaate hain
* * *
Rukh
Jab chirago’n se pheraga chahra
Teri ankho’n me hoga andhera
Rukh zamee’n ne jo suraj se phera
char su dunya me chaya andhera
* * *
Phul
Har ada par tumhari mera salaam
Raushni ke nagee’n ho barish me
Phul kitne Hasee’n hain barish me
Zindagi me bahar hai tumse
Mere dilko qarar hai tumnse
Jhum ke dete ho khushi ki khabar
Tum pe hoti hai gul hare ke nazar
Zindagi ik naee si milti hai
Jab kali phul banke khilti hai
Phul gam sare tum mitate ho
Jab havao’n me sar hilate ho
Har ada par tumhari mera salam
Hai labo’n par tumhare mera payam
Zabaan-e-Khamoshi
Ghazal
Khaamoshi ke lamhat mere kitni bate’n karlete hain
Jazbat mere khilke mujhko har raz bayan kardete hain
Ahsas mere kia chamke hai’n tha inpe dahshat ka saya
tera hi rasta sidha sa tu batla apna hi rasta
Reh par tu aisi mat leja jo dur hame tujh se karde
gahri khaee me lajae raste jo tere nahi hote
Hasrat se na dekho dunya me shohrat paise aur izzat ko
pasti ho na peeche iske bhi ye bat barabar tum dekho
Meri tanhaee hei meri haq is par ek hi mera hai
dilki becheni hai sahara jisme tera basera hai
Dilse jo tamanna mit jae kia aesi hasti jeeti hai
dunya chalti hai tamanna se aur hasrat iski beti hai
* * *
Be samjhe ham jo aag pe rakhte chale gae
Ghazal
Din zindagi ke kitne hi ghat’te cha’le gae
Ham khahisho’n ke simt jo bardthe chale gae
Apne ma’ashire ki hain kuch aisi bandishe’n
Ham bardhne ke bajae sukardthe chale gae
Khoon-e-jigar ke peene me, hai kia koi nasha
Kiun dusro’n ka khoon vo peete cha’le gae
Ik ek nas pe bando’n ki hai tujhko ikhtiyar
Aazadi dilko kaisi ye dete chale gae
Hamko ibadato’n ka sila is tarah mila
barish me jaise zarf ko bharte chale gae
Motor pe baith ke jo bashar daurdne la’ge
raftaar apni khud hi bhula’te cha’le gae
In khaali bartano’n me bhala ae kaise josh
Be samjhe ham jo aag pe rakhte chale gae
* * *
Hava
Hava tujhi se naee ik umeed milti hai
Surur-o-kaif ki hamko naveed milti hai
Jaha’n larazta hai tu jis jagah bhi jati hai
Tu ankh valo’n ko lekin nazar kab ati hai
Tere karam ne ha’me har taraf se ghera hai
Har ek nafs me tera hi bas basera hai
Tere hi dam se to dunya me jaan hoti hai
Teri har ek ada be zaban hoti hai
* * *
Misl saye ke hai Beenesh zindagi insan ki
Ghazal
Is shabab-o-husn me singar aafath dhaega
Aur shauq-e-behijabi aag si barsaega
Khush guma’n hota hai kiunkar hai alag auro’n se tu
Daastano’n me tu apni dasta’n hi paega
Abru-e-ilm hai raushan khayali me magar
Tang nazri se jaha’n ko kia jaha’n batlaega
Sath teri hai ik ulfath mauth ho ya zindagi
Ae zamee’n agosh tera hi ha’me apnaega
De janam taklif se aulad ko ma’n is lie
Nam ma’n ka hashr me leke pukara jaega
Ilm banjaega ik qatra aur hasti ik behar
Vus’ate hasti muqabil ilm ke jab laega
Misl saye ke hai Beenesh zindagi insan ki
Raushini hogi to hoga jaegi to jaega
* * *
Vo nazar pherte hain jab Beenesh
Pae kiunkar havas pe chal ke ama’n
Hai girift sakht iski ae nada’n
Karne poore adhure sab arma’n
Apni koshish me laga hai insa’n
Pias teri bujhane paimaana
Is jaha’n me kaha’n rakha hai vaha’n
Na rahega na pahle tha hargiz
Hai tere vaste ik aur jaha’n
Mere mahbub tere pa’ne ko
Ham bhatakte rahe kaha’n se kaha’n
Kare’n samjhauta kaise dunya se
Kash ke ham na lae jate yaha’n
Vo nazar pherte hain jab Beenesh
Dilko lagti hai jaese ek sina’n
* * *
Hazaro’n sal jeena hai tumhe jaake ye dunya se
Hazaro’n sal ka saman rakhlo sath tum apne
Hazaro’n sal jeena hai tumhe jaake ye dunya se
Agar jaoge khali hath marke is jaha’n se tum
Banane me vahan sama’n cardordo saal leloge
Agosh me hai Ya Rabb ham teri hi rahmat ke
Dar kholte hain ham khud aafat ka musibat ka
Ho khauf ha’me kiunkar ae jo bala ham per
Hazaro’n sal jeena hai tumhe jaake ye dunya se
* * *
Kaisi Basti
Jhopard patti valo’n se kiun tahzib ki khahish hai apni
Bunyadi zarurat bhi dekho hoti hai kia unki poori
Paani jaisi shai ki khatir unko kia nahi uthana hai
Jo jagah bhi sona hai unko aur isi jagah pe nahaana hai
Kaprde kab suthre dekhoge tum jhopard patti valo’n ke
Batalao pani ka nal bhi kia unke ghar me paoge
Thorda sa pani la’ne ko taklif uthakar jeena hai
Itne hi pani me unko dhona bhi hai aur peena hai
Hain nalo’n ki unki galya’n bacchon ke khel ki hain nadya’n
Hai gaali ki ik gunj yaha’n har nafs ko hai takleef yahaan
Is shaher me unki khidmat ki har nafs ko haajat hoti hai
Bunyadi zarurat ki unko batlao sahulat hoti hai
Vo khu’li fiza me fitrat ki hajat ko poora karte hain
Insa’n haivano’n ke jaise is bebas daur me rahte hain
Aisi basti se gar guzro kuch lamhe ye dil hil jae
Gar vaha’n raho tum bhi kuch din sarke ye purze hil jae
Voto’n ke bank faqiro’n ke ye jhopard patti khahlae
Behbudi ke va’de karke vote unka leader lejae
Har bala ki zad me rahte hain bebas gandi basti va’le
Khaae bimari ka thappard har dam jhopard pati va’le
Vo sood ke garzo’n me bebas chakki me piste rahte hain
Goonda gardi ke fauladi panje me ghiste rahte hain
Unko madhoshi me rakhke sarkaar dil unka bahlaake
Unko tv aur filmo’n ke rangeen jahaan se phuslaake
Adath me nashe ke unko bas gaafil hi hardam rakhte hain
Saste hi bikte rahte hain madhosh nashe me rahte hain
Is mulk ki gandi basti ki jab tak halat na sudhar pae
Hargiz hargiz ham sab ki yaha’n tab tak halat na sudhar pae
Beenesh vatan ki khatir vo kia jaan ki qurbani denge
Ja’n hardam unki nikalti hai ab jaan kaha’n apni de’nge
* * *
Jazbat
Daulat ki tarh hote hain jazbat basher ke
Jo karch karoge to rahenge vo asar ke
Seene me vo ik dher sa banjaenge rahke
Tum isko chupa rakhoge posheeda jo karke
* * *
Naakami
Tordenge dil na apna nakaam honge jab bhi
In kamranio’n ki naakamiya’n hai seerdhi
Haasil vohi karenge dunya me sarbulandi
Jordenge phir dobara bikhre jo unki hasti
* * *
Khayalaat
Ghazal
Nafrat ki raho’n pe chalke kuch log mohabbat chahenge
Nafrat ki zamee’n pe kaise vo ulfat ke gulshan paenge
Ik ilm ki dunya me aalim kya unchi ur’anen bharta hai
Ik vazni patthar se jaahil dunya me hardam jakhrta hai
Lahro’n pe samandar ke jaise din apne guzare insan ne
Aage vo sukoon se bardhe magar phir toofanon me ghir jae
Ab eent, cement aur lohe ki har ik ko zarurat hai kitni
Insan ko bulandi hasti ki aise me kya rahke milti
Dunya hai dauzaq momin ka, goya shaitan ki basti hai
Jannat me jo shaitan nahi khushyo’n me yahan ki hasti hai
Insano’n se neki karke insan Khuda ko pata hai
Vo karke tijarat Khaliq se, dunya me jannat lata hai
Gar had se guzre ga insan ka sog manane me insa’n
Naraz Khuda se hoga vo bando’n me kahlae vo nadaan
* * *
Buland Himmat
Java’n himmat jaha’n me vus’ate’n chahega bharhne ko
Talash e asmaa’n hi me ra’he parvaaz karne ko
Ghutan mahsus karta hai samaji bandisho’n me vo
Hayat-e-Javidan kahta hai ja’n se vo guzarne ko
* * *
Kamzor badan, sakht tera imtehan hai
Chahra Khuda ka paane me kya izz-o-shaan hai
* * *
Paise vala hi tanha hardam hai
Paise valo’n me vafa ka gham hai
Lutf baham hai jaha’n zar kam hai
Pas lae kami ye insan ko
Paise vala hi tanha hardam hai
* * *
Gheebath
Karke Gheebath kiun jafa Khaliq se ye insa’n kare
Admi ke nuqs ko Khaliq hi gar pinha’n ka’re
Bhai ki mayyat ka jaise kharaha ho gosht vo
Hukm-e-Qura’n bhul ke kiun geebaten nada’n ka’re
* * *
Adaakar
Tasveer kashi karte hai’n insa’n ki adaakar
Yu’n nafs ki pasti ko dikhate hai adaakar
Badnam nigahon se unhe dekhte kiun ho
Vo haq jo bata’te hain to hote hain jafa kar
* * *
Kya mohabbat ke usulo’n pe koi rota hai
Ghazal
Kya mohabbat ke usulo’n pe koi rota hai
Apne mahbub se mashkuk koi hota hai
Aaina dekh ke khush hota hai insa’n kitna
Aae’n ayyam jo peeri ke suku’n khota hai
Asma’n par hai tu aur teri zami’n par ham hai’n
Tere deedar ko pur ashk ye dil rota hai
Apne aa’za ne jo a’amal kie nek-o-bad
Hashr ki fikr me dil hoto, nahi sota hai
Tera mahbub chupa dil ke maka’n me Beenesh
Chaen apna kabhi aise me koi khota hai
* * *
Kaunsi dunya hai apni kis lie jee’te hain ham
Arzu aur khahisho’n ke bojh ke neeche hain ham
Hai haqiqat apne peeche khab ke peeche hain ham
Dilki dunya se alag kitna hai baahar ka jaha’n
Kaunsi dunya hai apni kis lie jee’te hain ham
* * *
Maut ko dur kiun batate ho
Dur toofa’n me le’ke ja’te ho
Pas sahil ko kiu’n dikhate ho
Arzu kiun ho tum java’n dilme
Maut ko dur kiun batate ho
* * *
Daini paregi varna narazgi ki qeemat
Ik umr tak chukai hamne hansi ki qeemat
Mahngi bardi parthi hai hamko khushi ki qeemat
Karte ho dillagi jab tum ehtiyat barto
Daini paregi varna narazgi ki qeemat
* * *
Khak ki Qurbat
Pas jab khak ke insan yaha’n hota hai
Pak dil piyar bhara shauq baya’n hota hai
Har milavat se vo ahsas ko rakhta hai dur
Iske see’ne me vafao’n ka jaha’n hota hai
* * *
Tark-e-Lizzat
Tark-e-lizzat me hai bardi lizzat
Is tarah jeeke milti hai izzat
Chordo ho agar buri aadat
Jiske anjam me hai ik zillat
* * *
Vohi dunya me dekha jata hai
Tajruba ye jaha’n sikhata hai
Ranj-o-gham ye ha’me dikhata hai
Jo bhi aega pesh hashr ke din
Vohi dunya me dekha jata hai
* * *
Hogae kitne murattab sab yaha’n
Ghazal
Hogae kitne murattab sab yaha’n
Khogai hai saadgi ja’ne kaha’n
Chahte ho dekhna insa’n ko tum
Zindagi haiva’n ki hai tumpe aya’n
Khuaf ka saya ho goya shahr me
Kiya hai vahshi ghar se bahar ka jaha’n
Ek ko hai dusre ki kiun talash
Kar nahi sakte jo ha’le dil baya’n
Ek nuqte se bhi kam lagte hain sab
Aasma’n ke samne apne makaa’n
Hosa’ke tarif auro’n ki karo
Dekhlo gar nuqs tum kardo niha’n
Sadgi me hai suku’n aur dil ka chaen
Sadgi me hai khushi aur hai ama’n
Hai kaha’n insa’n ke dilko rok tok
Hai sada ahsas insa’n ke java’n
Khush raho shikva nahi tumse koi
Tum na the kis gam me thi Beenesh ki ja’n
* * *
Sawal
Dauzaq se ja’n churdake tum kya Hawz-e-Kawsar paoge?
Jab tak na zamane ki suzish tum dil ke andar paoge
Bhuka chahra tum dekho gar mu’n apna na phero sharmakar
Jannat ke huro’n ke manzar kya tum ja’n parwar paoge?
Jo kaprde resham ke pahno dekho jab kohna poosho’n ko
Jannat ka ik jama socho kya roze mahshar paoge?
Veera’n nashi’n basti se gar, guzro pur kaef savari par
Kya jannat me bhi tum ik ghar dunya se bahtar paoge?
Jab tuti tammanae’n dekho jo phero chahra ye socho
Mahshar me kaise batlao Firdaus ke manzar paoge?
Masum ki bebas nazro’n ki parwa’h na kabhi karne vaa’le
Tum hath Payambar (S.A.W.) ke kaise apne shano’n par paoge?
Tum boodhe pusht khamida ko bebas gar chordo ye socho
Waqt-e-aakher Maula [Ali (A.S.)] ka tum kya daste mutahhar paoge?
Hasrat me Bagh-e-jannat ki jab ankh na Beenesh roegi
Bakshe jo hamesha ki rahat kya aisa ik ghar paoge?
* * *
Zindagi tujh me to khas aisi koi bat nahi
Ae jaha’n mere lie tu koi saugaat nahi
Tujh ko apna saku’n aisi bhi meri zat nahi
Aur ik bar tujhe dekhen palat ke phir ham
Zindagi tujh me to khas aisi koi bat nahi
* * *
Apne andar ki burai ko batate kiun ho
Apne andar ki burai ko batate kiun ho
Jab Khuda aeb chupae to batate kiun ho
Dil parakanda hai , ashufta khayali lekar
Rahbari ke lie tum saamne aate kiun ho
* * *
Hai hamkalam tujhse ye nazzarae jaha’n
Hai hamkalam tujhse ye nazzarae jaha’n
Tanahion me milti hai dilko hi bas ama’an
Na shukri na umidi-o-ahsas kamtari
Aajiz basher ko kardenge lelenge uski ja’n
* * *
Kaise Urdu me akhir hain?
Ham apna gham bole’n kaise shikve ki zaba’n khole’n kaise
Gam dil ke ab dhole’n kaise hai sharm hame’n role’n kaise
Kis daur me Urdu shair hain?
Kaise Urdu me akhir hain?
Kia bolen javano’n haal-e-dil kiun aj hue aise kaahil
Tumko samjhana la haasil apni hi zaba’n se ho gafil
Kia ham Urdu me maahir hain?
Kaise urdu me akhir hain?
Ye kaisa gham ham sahte hain toofa’n me kaise bahthe hain
Ham ghaer ki boli kahte hain aur fakhr bhi karte rahte hain
Khw’ari aur zillat zaahir hai
Kaise Urdu me akhir hain?
Likhna Urdu aata hi nahi pardhna Urdu bhata hi nahi
Gham iska kiun khata hi nahi is par tu pachtata hi nahi
Kahte hain ham vo munkir hain
Kaise Udu me akhir hain?
Par’khau’n ki mahnat jati rahi tarikh ki daulat jati rahi
Aur apni taaqat jati rahi Allah ki rahmat jati rahi
Ham Beenesh kaise sabir hain
Kaise Urdu me akhir hain?
Bardho aage batado tum rukavat kaise sahte ho
Rukavat dur karne ki jo tum taqat nahi rakhte
Jo aage bardh nahi sakte yehi manzil hai kahte ho
Hue bebas to apnane lage kamzorian akhir
Bardho aage batado tum rukavat kaise sahte ho
* * *
Derahe hain jan apni hanske parvana sifat
Janibe imaa’n tu leja aur taqwa de hame’n
Rasta manzil ka apni ab to dikhla de ha’me
Derahe hain jan apni hanske parvana sifat
Aisi hi taufiq de aur aisa rutba de ha’me
* * *
Maula ki mohabbat rakhe Khaliq ki ita’at
Khaliq ke taqarrub se mi’le dilko nifasat
Hojae yun’hi hafize ki apni hifazat
Insa’n ka ahsas java’n rahta hai hardam
Maula ki mohabbat rakhe Khaliq ki ita’at
* * *
Ruh par ahsas ka qabu hai mere hamsafar
Dusro’n ke jism par insa’n ko qabu hai magar
Ruh ko apnane ke isme kaha’n hai dil jigar
Hai jaha’n ahsas manzil ruh ki bhi hai vohi
Ruh par ahsas ka qabu hai mere hamsafar
* * *
Rivaj
Bade be-raham hote hain kamane ke lie paisa
Garibo’n ki na-parvah ki bana vo muqtadar kaisa
Rivajo’n ko rakha baaqi vo baqi rakhne hasti ko
Jie ga tab hi muflis jab rivajo’n ko chordega
* * *
Ham guzre hain jo Beenesh had torke dunya ki
Ghazal
Insan zamane ka jab aks dikhata hai
Kirdar hi apna vo dunya ko batata hai
Jazbat ye insa’n ke hain baad-o-hava jaise
Insan hava’on ko kia qaedi banata hai
Karsakta hukumat hai jo saltanat-e-dilpe
Mukhtar hai vo apna dil bas me jo lata hai
Ilhad ko apnaya kya shauq tumhara hai
Allah ka vo rasta ik nur dikhata hai
Ham jan gae dunya degi na kabhi raahat
Aaram ki kahish me kiu’n dilko rulata hai
Tum haar ke bikhro mat koshish ko rakho jari
Aandaz zamane ka ye dars sikhata hai
Ham guzre hain jo Beenesh had torke dunya ki
Bolenge jaha’n kaisa dekar ha’me jata hai
* * *
Rishte hojaenge zabani jab
Sath deti na ho javani jab
Guzre ayyam ki kahani jab
Aarzuo’n se dil lagae’n kya
Rishte hojaenge zabani jab
* * *
Kar ke vapas amanat ae Beenesh
Ibteda jiski ho bulandi se
Aviza’n hai vo jaise rassi se
Dubne chahatho’n me uski tumhe
Rang sab metne hai’n hasti se
Beqarari ko hai talashe khushi
Hai suku’n kisko aisi basti se
Paas ati rahi thi tanhaee
Ham the gafil khud apni masti se
Kar ke vapas amanat ae Beenesh
Pao aafaq apni pasti se
* * *
Mahbub-e-Majazi
Mahbub-e-haqiqi ki jaanib dil torke apna lejae
Mahbub-e-majazi dunya me kidmat aisi karke jae
Jitni bhi umeden insa’n ki hongi vo sari tutengi
Ehsas bulandi paega nafrat dilse apne jae
* * *
Samajh
Zarurat marhalo’n ki hai koi matlab samajhne ko
Madad se tajrubo’n ki mard har ik bat ko samjhe
Magar aurat marahil tajrubo’n se aur aage hai
Zariye se daruni his ke vo aafath ko samjhe
Ke aurat dilki bato’n ko bakhubi jan jati hai
Magar ye mard zaahir hi ke bas halaat ko samjhe
* * *
Maqrooz Mulla Nasruddin
Maqrooz ek bar hue Mulla Nasruddin
Gurbat me ghir gae the bohot Mulla Nasruddin
Jab garz-khah unko saatane lage bohot
Chakkar vo unke ghar jo lagane lage bohot
Tang aake rah dekhiye kya khub nikali
Kahne lage bivi se suno O meri piari
Aaenge garz-khah to mai aisa karunga
Jaldi se ek perd pe aangan ke chardunga
Un sabko meri ja’n ye tum bat bataana
Karden’ge ada garz magar tum na satana
Aega abke sal jo mausam bahar ka
Bun bun ke shawl paisa kamaenge khub sa
Mande tamam bherdon ke charne jo jaenge
Jangal se apne ghar jab vapas vo aenge
Deevar se vo peeth phir apni khujaenge
Ik ek baal unka ham kuch aise paenge
Jab baal isi tarah vo sab jamte jaenge
Acha sa oon balo’n ka unke banaenge
Ik shawl phir is oon se pyari banaenge
Le ja’ke market me ise bech aenge
Ache se daam shawl ke jab hath aege
Paisa bhot sa shawl hi se ham kamaege
Paise se garz apka sara chukaenge
Albatta mohlat apse ham thordi chahenge
Aa pohncha garz-khah ghar pe jo ye hua
Hoke pareshan perd pe tab mulla chard gaya
Ik ek bat mulla ki bivi ne tab kahi
Khamosh mulla perd pe jab ja’n pe aa bani
Sun ke ye baataee hansi garz-khah ko
Bola ke khub ullu banagaya suno
Ye soch ke kuch aur hansi uski bardh gai
In qahqaho’n ki ek sada mulla ne suni
Jab sunchuka hansi ko to mulla ne ye kaha
Kiun tum na hoge kush tumhe paisa to milgaya
Mere naseeb me likhi hai shawl-bafi bas
Bherdo’n ka intezar hai kismet hi meri bas
* * *
Paigam ye Beenesh ka ae baad-e-saba dena
Ghazal
Ae gard-e-mazar unko ye bat bata dena
Hasrat bhi hai dafn isme usko na jaga dena
Ham jeet ke bhi ha’re kar kar ke vafadari
Rishto’n me hain ranj-o-gam dunya ko bata dena
Ashko’n ke samandar me kya manzil-e-iqaan hain
Fitrat hai ye dunya ki dil leke dagha dena
Manva’ne vajud apna baatil ki ra’hi koshish
Mazloom ke gulshan ko fitno’n ki hava dena
Is ahd me besharmi ki kaisi bala aee
Mahfuz tu rakh ya rabb taufeeq haya dena
Ashko’n se mila dilko kya auj Khudaya ab
Shikva na raha Ya Rabb tera ye rula dena
Apna bhi hai begana khud been ye zamana hai
Paigam ye Beenesh ka ae baad-e-saba dena
* * *
Hamse insan bhi dunya me jie jaate hain
Hamko ahsas pe khud apne hansi ati hai
Apne armaan bhi hairan hue jaate hain
Kya hamara bhi ta’luq hai isi dunya se
Hamse insan bhi dunya me jie jaate hain
* * *
Kiun jahan se ye dil laga baithe
Hath me aag ko utha baithe
* * *
Dard ki zanjeer ka kona dia hai ik tujhe
Tu jidhar chahega uska rukh udhar hi jaega
* * *
Bardi gamgeen ye sham a’ee hai
Bardi gamgeen ye sham a’ee hai
Tujhe paighaam kaisa la’ee hai
Har ek paise ik pyar hai jo insa’n ko
Jo pai pai ki lazzat vo bakshega ja’n ko
* * *
Rabb ne firdaus bhala kaise banaya hoga
Martaba aql ka dunya me kaha’n kamil tha
Dil na hota agar insaaf bhot mushkil tha
Hamko milta hai zamane se bas ik dars yehi
Qadr jazbat ki insa’n nahi karta hai koi
Jung dunya me agar ho to hai sab kuch jaiz
Dil ke paikar me eesar na karde aajiz
Kya nazara Kare’n deevar hai oonchaee hai
Perd aangan ke ha’re dil mera bahlaenge
Tu’ne baksha hai mujhe tohfe me ik ik lamha
Lutf yado’n ka tere lelu’n ye kafi hai Khuda
Dekhu’n insa’n ko agar chahu’n nazara tera
Apni hasti me neha’n rakkhe vo alam sara
Dekha jab manzar-e-dilkash to tasavvur aya
Rabb ne firdaus bhala kaise banaya hoga
* * *
Qat’at
Hasti ka shajar teri jo sar sabz rahega
Din rat chaman tera ye phulega phale ga
Jab dil ke gulistan ko keeno’n se hasad se
Kharo’n se jahalat ke jo tu saaf rakhega
* * *
DUA
Jis tarha se asma’n ko bharchuka taron se tu
Mere daman ko sajade is tarh khushion se tu
Teri rahmat ke hazaro’n shukria mere Khuda
Mordta hargiz nahi mu’n mangne valo’n se tu
* * *
Noor
Noor ko gaer nahi bhata hai
Noor bas noor me samata hai
Noor began’on se Qareeb kaha’n
Noor tareekya’n bhagata hai
Daeimi zindagi mile isse
Ye fana hone se bachata hai
Apni hasti ko raushni dekar
Hamko ra’he jina’n batata hai
Noor ik Paikar-e-Ilahi hai
Ik jahan javida’n dilata hai
Hamko aa’la maqam karke ata
Dilke gham saare vo mitata hai
* * *
Beenesh ek saya sa chalraha hai a’ngan me
Ghazal
Ek ek zarre me, jalva te’ra hi paya hai
Is makaan-e-dil ko hamne tujh se basaya hai
Hukm-e-haq na ho jab tak, pattha bhi, nahi hilta
Pas aadmi to kya, keerda bhi, kab aya hai
Ham tamam khabao’n ko badlenge haqiqat se
Hamko aisi koshish ne kis qadar rulaya hai
Hain sahulaten kya kya, dil ka chaen hai gaib
Is taraqqi ne hamko kaisa din dikhaya hai
Beenesh ek saya sa chalraha hai a’ngan me
Zindagi tumjhe maine is tarah se paya hai
* * *
Qat’at
Seedhi si lagti hai magar hai barde pech-o-kham ki
Hath insa’n ra’he manzil me bhot malta hai
Na chala hai na chalega ye jahaan ka sikka
Aasma’ni sikka koi aur tera chalta hai
* * *
Karte ho kiun ta’ajub dunya ki be rukhi par
Chahra yehi hai iska kirdaar hai jaha’n ka
Hai sabr jis jagah bhi khaliq bhi hai vahi’n par
Apni hifazato’n ka har rishta hai yaha’n ka
* * *
Amal koi bhi sarzad ho kahi’n chupta hai insa’n se
Agar ho kam posheeda kaha’n vo bas me insa’n ke
Ke phailega kaha’n tak kia asar chorega dunya me
Zara har kam se pahle koi anjam ki soche
* * *
Apne andar ka jaha’n ek vohi dekha hai
Silsila jisne chirago’n se jaha’n jorda hai
Mujhko be’mani lage dilke sab ahsas mere
Rishta-e-dilko kabhi tujhse se agar torda hai
* * *
Bad marne ke ik umeed ko zinda karke
Saump ke sare zamane ko chale jana hai
Ham umido’n ke charago’n ko rakhenge raushan
Varna aana ye hamara bhi koi ana hai
* * *
Dardmand Larki
Ye bebas zindagi kab tak rahegi
Sardak pe maine dekhi ek lardki
Bardi takleef me vo jarahi thi
Zamee’n pe ghiste ghiste chalrahi thi
Bandhi paao’n me thi maili si patti
Barae nam kaprde th’e badan me
Bhot gande th’e maile uske tan me
Sardak ke bacche usko cherdte the
Barde ye dekh k anjaa’n the usse
Vo sahti hogi garmi aur sardi
Badan ki jild kali khurduri thi
Sahara dene vala tha na koi
Bardi bekas nazar ati thi larki
Khuda jaane kaha’n se aee thi vo
Barde masum chahre ki thi vo
Vo taqriban sardak ke beech me thi
Bardi bebak si baithi huee thi
Guzar tha pas hi se gaardion ka
Jo hamdardi ko dam bhar koi rukta
Na karta koi ye zahmat gavara
Kinare par u’se aa’ne ko kahta
Sardak ke darmiya’n baithi thi larki
Kise parva bhala iski pardi thi
Har insan pherta tha mu’n ko apne
Ise chorda tha sab ne yu’n tardapne
Ye manzar dekh ke takleef ka sab
Jatae’n isse hamdardi bhala kab
Vahi’n baithi thi larki besahara
Andhera raat ka phaila hua tha
Sardak par raushni thi gaardion ki
Nazar ati thi larki beech me thi
Vo thi bezaar shayed zindagi se
Vaha’n baithi thi vo be khauf ho’ke
Vaha’n paidal ik aurat jarahi thi
Vo chadar sarpe ik ordhe hui thi
Chanbeli ka lei hatho’n me gajra
Kisi se usko ye tohfa mila tha
Ke sikke chand paison ke nikale
Bardha kr ahth usko balsh da’le
Chanbeli ka jo gajra hath me tha
Vo gajra bhi use hi baksh dala
Khushi se phul ko leke vo lardki
Ishara karke balo’n ko ye boli
Ye gajra mere balo’n me lagana
Meri zulfe’n parisha’n tum sajana
Nigaho’n me tha uske dostana
Musibat me vo uska muskurana
Ki khahish isne ae lardki zara sa
Khisak ke ik kina’re par to hoja
Mohabbat ki nazar se isne dekha
Phir isne abt ko auarat ki mana
Khisak kar jab kina’re pe vo aai
Chamak thi piar ki ankho’n me uski
Sardak ke pas aurat ne sa’nvaara
Vo gajra Uske balo’n me lagaya
Bata khaya bhi kuch aurat ne poocha
Mai hu’n bhuki, nahi khaya hai khana
Ye sunkar socha kuch aage bardhi vo
Bahen jo pas thi kahne lagi vo
Paresha’n hal me bhi gar ho lardki
Use singar ki bhi fikr hogi
Vo lardki peeche arahi thi
Kuch unse bolti hi jarahi thi
Gali me murd gaee aurat vo apni
Ye socha itni bebas vo na hoti
Vo ghar jate hi bhai se ye boli
Ke jaake jald dedo usko roti
Najane ab vo kis halat me hogi
Sardak pe baithi hai ma’zur lardki
Idhar hone lagi jab tez barish
To barush se bardhi ek aur ranjish
Khuda ja’ne vo kis halat me hoti
Jo barish teztar hokar barasti
Ye insa’n aj ka kaisa bana hai
Ke hamdardi jatana bhulta hai
Raeeso’n ki ka’mi kia shaher me thi
Magar iska na tha hamdard koi
Kaha’n imdad karsakta kisi ki
Jaha’n me kab kisi ka hai koi bhi
Ta’luq hamse kia iska nahi tha
Thi hamsaya hamari vo nahi kia
Batao bhik dene se khudara
Adae farz kya hoga hamara
Vo pa’legi suku’n ki zindagi kya
Ke uska chaen kya apna bhi hoga
Batao behisi kab tak rahegi
Ye bebas zindagi kab tak rahegi
Tajleel ye kaisi hoti hai is daur me dekho aurat ki
Tajleel ye kaisi hoti hai is daur me dekho aurat ki
Urya’n kardeke usko phir tareefe’n hoti hain kitni
Tajleel karo mazduro’n ki tajleel tumhe gar ho karna
Har ek maka’n vo banate hain rahne ko ghar hi nahi unka
Aurat ke tan ko sarahte hain us ka eesar bhulate hain
Aurat hai ma’n aur bhi ye bat nahi vo batate hain
Tajleel karo ja’n baz ki tum qurbani ja’n ki deta hai
Har chiz fida kardeta hai uska vo a’vaz kab leta hai
Tajleel karo in bacchon ki bachpan jo apna khote hain
Mahnat majduri karke vo bachpan hi me budhe hote hain
Tajleel karo mahnatkash ki aaram se kab vo sota hai
Hamko aasayash dekar khud gurbat me bebas hota hai
Tajleel karo is insa’n ki jo garmi sardi sahta hai
Vo khun jigar ka peeta hai, khushya’n hi deta rahta hai
* * *
Vus’ath-e-Nazar
Umr hoti hai apni bas itni
Hoti hai vus’ate nazar jitni
Rishta khaliq se ho agar jiska
Piar makhluq ko vohi dega
Kare mahsus kaenat koi
Jisko khaliq ka ho lihaz vohi
Dur tak kirne’n koi jati hain
Koi qadmo’n ko dekh pati hain
Peeche sav sal dekhta hai koi
Koi dekhe hazaar sal kabhi
Ruh
Apni har bat pe vo ardti hai
Chord do ruh ko bigardti hai
Jism par gar asar nahi hota
Dil dukhane se ruh sardti hai
Tan ka tum mael saf kardoge
Gandagi ruh ko jakardti hai
Naz uthaoge tum jo hasti ka
Ruh ke aage vo akardti hai
Do ge aala maqam jab Beenesh
Ruh chori teri pakardti hai
Kya ham bhi riha honge is sakht aseeri se
Ik tu hi to apna hai jo tord de zanjeere’n
Rubaru ane ko ik aur adhura din hai
Iski takmil ki dilko hai bardi be chaini
Dil jo apno’n ka dur ho hamse
Ham bhi aiso’n ko log kahte hain
Shauhar ko koi bivi jo sartaaj kahegi
Banjaegi vo khadima sathi na rahegi
Ik chote se halqe me tumhe band karenge
Ye film to bas dil me gam-o-ranj bharenge
Ye bhuk bhi insa’n ki gairath bardi rakhe
Khamosh vo rah jaegi do bar hi kah ke
Kandho’n pe hai ik bojh uthane ke barabar
Chahoge agar hasti nikhar jae sa’nvar kar
Khidmaat jo TV ke sabab hamko mila hai
Bigrde huo’n ko aur bhi barbad kiya hai
Husn
Tash ke patton ke jaisa husn aurat ka nahi
Sathion ke samne rakhde’n jo ham isko kahi’n
Husn hai manind aatish ke jo rah jae khula
Aag lagte jaegi par faeda hoga zara
Dogna hoga asar aatish agar parde me ho
Zindagi ik bakshde aise me vo insan ko
In Praise of Mohtaram Ustad Late Janab Rasheed Ansari Sahab
The poetic translator of Deewan-e-Hafiz in Urdu poetry
Apke Baad
Naqsh baqi hain saare apke baad
Dard-o-gam ke sharare apke baad
Aapne raaste jo dikhlae
Dilko har dam hain piyare apke baad
Lagzishe’n
Hoti hain lagzishe’n hi aiso’n se
Ho na jiski talafi paiso’n se
Faisle karte hain jo man maa’ne
Rabt unka hua hai kaiso’n se
Pas aati hai zaeefi jitni
Kiu’n hai choti si javani itni
Iski lambi hai kahani kitni
Itni bardthi aas jeene ki
Pas aati hai zaeefi jitni
Umr ju’n ju’n ye bardhti jati hai
Natavani ko pas lati hai
Mang le har koi zamee’n tujhse
Aasma’n tujhse mangte hain ham
Takhaiyyul
Haqiqat se zaed hasee’n hai Takhaiyyul
Hai markaz jahan bhi kahi’n hai Takhaiyyul
Bardi sakht pursish hai apne amal ki
Kabhi admi ka amee’n hai Takhaiyyul
Takhaiyyul hi chaya hai insa’n pe hardam
Haqiqat ki manzil nahi hai Takhaiyyul
Agar asma’n hai amal admi ka
To is asman ki zamee’n hai Takhaiyyul
Haqiqat se hamko thi ik din mohabbat
Magar aajkal dilnashee’n hai Takhaiyyul
Takhaiyyul se daaman bachaega kiunkar
Ke har aarzu ka makee’n hai Takhaiyyul
Ho kaisa hi mausam hai sathi tumhara
Baharo’n me kya naznee’n hai Takhaiyyul
Tu raahat dilade Takhaiyyul se ya rabb
Hamare liye aatshee’n hai Takhaiyyul
Bohot ki hai Beenesh taraqqi yaha’n par
Ye dekho jaha’n tha vahi’n hai Takhaiyyul
Tasleem Nafs
Baccha agar na mane ye thanenge validaen
Ik mo’tabar ke zimme use denge validaen
Ta’ke san’vare bacche ke akhlaaq khubtar
Acchi si tarbiyat ka mile usko ik samar
Haq ki raza hi kahte hain ham aise kam ko
Tasleem nafs kahte hain ham iske nam ko
Kunda-e-Natarash
Betarasha hua kunda hai insan janam se
Mauqa diya qudrat ne san’varne ka jaha’n me
Gar khudko tarashega hasee’n hoga vo paikar
Phir apni jagah paega jannat ke maka’n me
Tasveer-e-Insa’n
Zindagi choti si haiva’n ki bhi ik tasveer hai
Jaanvar me aadmi ki dastaan tahrir hai
Zindagi haiva’n ki ik jeena sikhati hai ham’en
Apni aur havanon ki dunya me ik zanjeer hai
Dae’reh
Jaise jaha’n me hota hai insan daerah
In daero’n ke shaher mohabbat se hai bana
Insan goya purza hai vo ik machine ka
Ik dusre ka hoke muharrik vo chal saka
Jab tak na madad gar koi daerah banta
Harkat me kahi’n daerah asakta hai tanha
Chordi jo kashish apni to phir daereh takrae
Is harket-e-beja se hi barbaadi vo ik lae
Tanha gamo’n ko sahke
Jazbat me vo bahke
Ehsas tishnagi ke
Rahjaenge vo kahke
Ke saye ka zamaane me koi chahra nahi hota
Tumhe gar dekna ho pahlue raushan ko tum dekho
Andheri hasti jiski ho nahi chahra koi uska
Milega kuch nahi dekho agar tareek pahlu ko
Ke saye ka zamaane me koi chahra nahi hota
Sabr karne ki jisne thaani hai
Ik taraf sabr ki kahani hai
Ik taraf dil ki vo ravani hai
Ae khuda tu hai faqat unke sath
Sabr karne ki jisne thaani hai
Dairah-e-Irfa’n
Hota hai khatm daerah-e-agahi jaha’n
Irfa’n ke daereh ki shuru’at hai vaha’n
Ye zindagi hai qimtee tu sochle zara
Hai kaunsa maka’n tera tu hai kharda kaha’n
Hathi Baba
Aadab baja late hain ham hathi baba ki qidmat me
Hal apna tere jaisa hai ayyam hain apne mahnat me
Apne bedhap kirdar hi par hardam hai apni savari bhi
Apne aamaal ki sangeeni hai teri jaisi surat me
Piyare Machhar
Dekhte hain mujhe jo rat me machhar saare
Urd ke aate hain mere pas khushi ke mare
Luqma-e-tar hun mai’n unka vo shikari mere
Jaur se unke bane aaj to ham bechaare
Hal kya hai is baras hota hai kya
Aapke milne se dilko ye laga
Ek jannat mera alam bangaya
Hamko mausam aake ye kahne lage
Hal kya hai is baras hota hai kya
|